Ek Din Achanak Part 12

Raat bar Jay kashmakash mein pada raha ki pata nahin kal Sonali aayegi ya nahin. Maine use bata to diya tha ki Jawed Bhai bhi aayenge. Lekin kahin wo dubara ghabra na jaye. Nahin nahin aisa nahin ho sakta. Ye main kya bekaar ki baatein soch raha hun.

Sonali kal jaroor aayegi.

Subah Jay jaldi uth gaya aur tayyar hokar school mein pahunch gaya. Wahan usne dekha ki Jawed Bhai practice mein lage huye hain to jabardasti unhe beech mein se hi bula liya. Jawed ne kaha”Yaar itne besabar kyun ho rahe ho, wo aa jayegi. Abhi time hai”. Lekin Jay kahan sunne wala tha. Wo to bechain tha Sonali ko milne ke liye.

Tabhi Jay ko Sonali aati dikhai di. Shayad use pata tha ki mulakat mein time lagne wala hai isliye jaldi aa gayi. Jay ne gate ki taraf ishara karke kaha “Jawed Bhai dekho Sonali aa gayi hai”.

Jawed ne gate ki taraf dekha to chaunk gaye. Unhe saamne se ek moti, saanwali ladki aati najar aayi. Uske aankhon par bada sa chasma laga huya tha. Daaton mein taar lage huye the. Agar kisi ne wo serial dekha ho “Jassi Jaisi koi nahin” to bilkul wo jassi jaisi hi lag rahi thi. Khande par bag, haathon mein tiffin aur pani ki bottle, salwar suit mein. Aankhen jhuki huyi aur baalon ki choti banayi hui.

Jawed ki to hansi chutte chutte rah gayi. Hasna to bahut chah rahe the lekin Jay kahin bura na maan jaye ye sochkar apne aap par kisi tarah kabu pa liya. Unhone Jay se kaha “Yaar ladki to bahut sunder pasand ki hai tune. Lekin wo hamare paas aane ki bajay doosri taraf kyun jaa rahi hai”.

Jay ye sunkar chaunk gaya aur bola “Are wo andar hi kahan aayi hai. Wo to kisi saheli se baat kar rahi hai abhi tak gate par. Iske baad Jay ne wahan dekha jahan Jawed ishara kar raha tha to uska gala khusk ho gaya aur use jhatka sa laga. Baad mein ye sochkar ki Jawed ise Sonali samajh raha tha bahut joron se hans diya. Jawed to pehle sharminda sa ho gaya lekin baad mein wo bhi is baat ko sochkar bahut hansa. Hans hans kar dono ka bura haal ho gaya.

Itne mein Sonali wahan aa gayi aur dono ko dekh kar usne hasne ka karan poocha. Lekin dono bataye bhi to kya. Jay ne kaha ki koi khaas baat nahin hai. Jawed Bhai ek chutkula suna rahe the us par hansi aa gayi. Sonali ne kaha mujhe bhi sunna hai. Please mujhe bhi sunao. Ab dono kya bole. Lekin fir Jay ne himmat karke bola “Tum nahin samjhogi ise aur please aur insist mat karna.” Sonali ne socha shayad koi non-veg joke hoga isliye ye batane mein Sharma raha hai. Isliye Sonali ne kuch bhi poochna theek nahin samjha.

Uske baad Jay ne Jawed aur Sonali ka aapas mein introduction karwaya aur Jawed ne usse kuch idhar udhar ke sawal pooche jaise kaun se section mein ho, ghar mein kaun kaun hai, hobbies kya hai wagairah wagairah. Uske baad Jawed ne mujhe thoda door bulakar kaha “Yaar Jay kya kismat payi hai tune. Sonali ek bahut achhi ladki hai. Sunder ke saath saath intelligent bhi hai. Teri kismat se rashk hone laga hai dost.

Jay ne kuch nahin kaha aur sirf muskura diya. Uske baad Jawed wahan se chala gaya aur Jay Sonali ke paas wapas aa gaya.

Sonali ne Jay se poocha “Wo Jawed Bhai tumse akele mein kya keh rahe the”.

 “Kuch khaas nahin bas tumhari tareef kar rahe the.”

 “Jhoot bol rahe ho na. Meri burai hi kar rahe honge. Keh rahe honge ye kisko pasand kar liya. Na iski shakal achhi hai aur na hi akal. Mujhe pata hai main tumhare layak nahin hun”.

 Jay ne use baahon mein bhar liya aur kaha “Kaisi baat kar rahi ho Sonali tum bhi. Shayad mai0LL,ccn hi tumhare layak nahin hun. Tum to jiski jindagi mein jayogi uski jindagi to khusiyon se bhar jayegi aur bahut jald wo khusnasib main banunga.

Sonali ye sunkar bahut khus ho gayi aur isi khushi mein usne Jay ko kiss kar liya. Baad mein use pata chala usne kya kiya hai to wapas Sharma kar bhag gayi wahan se. Jay man hi man mein soch raha tha Uff ye ladkiyon ka sharmana. Hum ladke inke peeche paagal na ho to kya Karen. Jay wahin khada khada us kiss ke ehsaas mein dooba raha aura age aane wale sunhare palon ki yaadon mein kho gaya.

Lekin use kya pata tha ki Jindagi unke saath kya khel khelne wali hai.

Jab Jay class mein wapas aaya to class ke sab bache uski taraf dekh kar muskura rahe the. Jay ko kuch samajh nahin aa raha tha ki yeh kya ho raha hai. Thodi der yun hi sabke dekhne se pareshan hokar usne Jawed se is babat baat karne ki sochi. Tab Jawed ne bataya “Yaar galti se maine Jassi wala kissa Manish ko suna diya tha aur usne poori class mein dhindhora peet diya. Sab usi baat par hans rahe hain”. Aur ye kehkar jawed bhi hans diya. Jay kya bolta bas chup hokar reh gaya. Thoda uncomfortable feel kar raha tha lekin kya kar sakta tha.

Dheere dheere poori class mein aur fir poore section mein Jay aur Sonali ke pyaar ke kisse fail gaye. Lekin in baton se bekhabar dono roj park mein milte, baatein karte, ek dusre ke saath such dukh baatte, majak karte, haste-gaate aur aane wale jeewan ke liye sapne dekhte. Dono bahut khus the aur unhen kisi baat ki koi chinta hi nahin thi. Bas dono ko ek dusre ke saath rehna tha marte dum tak. Ek second ki judai kisi se bhi bardhast nahin hoti thi. Aksar Jay hi late ho jaata tha milne aane ke liye. Sonali ruth jaati thi aur fir Jay use manata tha. Kabhi uske saamne uthak-baithak karta kaan pakad ke, kabhi gaane gata, kabhi kuch karta kabhi kuch. Dono ke din khushi khushi beet rahe the.

Aksar dono School se bunk bhi kane lage. Kabhi film dekhne jate, kabhi restaurant jate, kabhi kahin aur ghoomne jaate. Jay ki financial position jyada achhi nahin thi fir bhi wo Sonali ko khus karne mein koi kasar nahin chodta tha. Sonali bhi Jay ki financial position jaanti thi isliye usne jay se kabhi koi demand nahin ki.

Infact kayi baar wo kharcha kar deti thi. Jay use aisa karne se mana karta to wo kehti “Jay tumhare mere mein koi fark hai kya. Aaj kal to ladkiyan ladkon se aage hain. Tum mujhe kya is baat ka ehsaas dilana chahte ho”. Jay ne koi jawab nahin deta aur hanskar bill uske aage kar deta. Lekin fir bhi wo Sonali ko bill paid karne bahut kam deta tha.

Lekin ek din Sonali ki class ke ek ladke Raj ne Sonali ko Jay ki baahon mein dekh liya aur bahut gusse mein aa gaya. Ab gusse mein isliye aaya kyunki wo Sonali ko chahta tha aur Sonali use ghaas tak nahin dalti thi. Uska khoon khaul utha ye sab dekhkar ki jise wo chahe wo kisi aur ki baahon mein padi rahe. Wo aisa nahin hone dega. Aisa sochkar usne Sonali ke ghar walon ko is baare mein batane ki sochi. Wo Sonali ke ghar ko jaanta tha kyunki Sonali ne kai baar apne class ke friends ko apne ghar par party mein bulaya tha. Aur party mein Raj bhi kai baar aaya tha.

Raj uske ghar recess mein school se aadhi chutti lekar nikal pada kyunki school shuru hone se pehle aur khatam hone ke baad to Sonali ghar par milti to Raj kaise unhen ye baat bata pata. Ye wo din tha jis din Sonali aur Jay School bunk karke ghoomne gaye huye the. Raj Sonali ke ghar pahuncha aur usne door bell bajayi. Darwaja Sonali ki mummy ne khola. Saamne Raj ko dekhkar wo chaunk gayi aur poocha “Raj tum aaj school nahin gaye. Sonali to school hi gayi hai”. (Wo Raj ko isliye jaanti thi kyunki party ke alawa bhi Raj Sonali se milne kai baar unke ghar aaya jaaya karta tha.)

Raj ne bataya “Haan Aunty main seedha school se hi aa raha hun. Meri dress se aapko pata nahin chal raha kya. Aapko ek jaroori baat batani thi isliye school se aadhi chutti lekar seedha aapke ghar chala aaya”.

 “Beta pehle andar aayo aur aram se baith kar batao”

Raj andar aa gaya to Aunty ne use pani pilaya aur phir poocha “Haan batao kya batana chahte ho”

Raj pehle to jhijhak raha tha ki kaise shuruat kare lekin fir himmat karke bola “Aunty Sonali aaj school nahin aayi hai”.

 “School nahin aayi hai. To fir kahan gayi hai wo. Saaf saaf bolo baat kya hai”.

 “Aunty wo ek ladka hai Jay uske saath”

Uska itna bolna tha ki Aunty ne ek jordar thappad uske muh par maarte huye kaha “khabardar aisa ghinona ilzaam meri beti par lagaya. Tum kya samajhte ho ki tum jhooti kahani sunaoge to mai maan lungi. Nikal jao yahan se aur fir kabhi mat aana yahan”.

 “Aunty pehle meri poori baat to sun lo”.

 “Mujhe kuch nahin sunna tum jaate ho ya nahin yahan se”

 “Theek hai Aunty main jaa raha hun lekin agar aap nahin samjhi to pachtayengi baad mein”

 “Nikal jao yahan se. Main ab aur kuch sunna nahin chahti”.

 “Jaa raha hoon Aunty lekin aap ek baar Sonali se jaroor poochna ki wo kahan thi aur kiske saath thi”

 “Mujhe apni beti par poora vishwas hai. Ab main tumhe ek second bhi bardasht nahin kar sakti. Dafa ho jao yahan se”

Raj ne kuch aur kehna theek nahin samjha aur ek vijayi muskan ke saath wahan se nikal gaya. Shaq ka beej to usne bo hi diya tha.

Lekin abhi baaji poori tarah se uske haath mein nahin thi. Wo aur planning mein lag gaya ki aur kya kiya ja sakta hai in dono ko door karne ke liye.

To be continued....